دم العجول

تأثير الالوان على الانسان هو أحد علوم طب النفس، الالوان مش بس طول موجي وتردد زي ما علماء الفيزياء بيقولوا، الالوان كلها لها تأثير على نفس الانسان

فاللون الاصفر مثلا بيدل على البهجة، البرتقالي بيدل على النشاط وهكذا، 

ولو حضرتك قريت عنوان المقال هتفهم على طول إننا هنتكلم عن اللون الاحمر.

 اللون الاحمر ليه تأثيرات كتيرة على نفسية الانسان، فاللون مثلا مؤشر عن الحب والعاطفة وعشان كده بتلاقي المصنعين بيعملوا قلوب ودباديب باللون الاحمر.

وعلى قد ما اللون ليه تأثير ايجابي إلا انه ليه تأثيرات سلبيه عديده، اللون الاحمر لون ملفت للنظر يرتبط بالمأساه، العنف، الإثارة، خطر الحروب، التطرف، العدوان، الجنس، النار،
الانسان عموما بيحس بحرارة في الجسم.

فى اول ايام عيد الاضحى يحتفل المسلمون، وبيقوموا بمزاولة الشعائر الدينيه زي صلاة العيد ودبح الاضحية، الموضوع فى مصر غير مراقب وغير مقنن "جايز يكون مقنن ولكن غير مراقب".

الشوارع فى اليوم ده بتكون مليانه بحور دم، لان الناس بتدبح فى الشوارع وفى ناس عندها فوبيا من الدم وبيحصلها حالات إغماء.

لان الموضوع غير مراقب فكتير بتلاقي الجزار بيدبح أضحيه أو اتنين قدام بعض، فى مقالات عديده بتقول إن إحساس الحيوان بالخوف قبل دبحه بيقلل من صلاحية اللحمه وأحيانا اللحمه بتكون سامه، ممكن حضراتكم تبحثوا علي الانترنت عن النوع ده من المقالات عشان تعرفوا إيه هي سلبيات خوف الحيوان قبل ذبحه. 

في حالات كتير بتتسجل لاضحية بتهرب لانها بتكون خايفة زي الفيديو اللي تحت ده.

الحيوان روح زي روح الانسان ولو رجعت للدين هتلاقيه بيتكلم زيه زيك بس بلغة الانسان مابيفهمهاش، إذن الحيوان ليه حياه كاملة بيخاف، بيفرح، بيحزن، ازاي بقى حضرتك بتعمل في مخلوق حي كده، تخيل بقي لو إنت فى معركه حربيه والعدو بيعدم اهلك أو انسان زيك حد من فصيلتك يعني قدام عينيك، نفس الاحساس بالخوف والرعب والقلق اللي بتحس بيه هو نفسه اللي الحيوان بيحس بيه.

جايز يكون البروتين الحيواني مصدر مهم جدا فى غذاء الانسان، لكن ده لا يمنع ابدا الرفق بالحيوان، لازم الدوله توجه بدبح الاضاحى بالمجازر الرسميه للدوله فقط عشان الناس ماتتأثرش بلون الدم الاحمر اللي ممكن سنة ورا سنة ليه تأثيرات سلبيه جدا علي الانسان، لاننا زي ماقلنا ثأثير رؤية اللون الاحمر " العدوان " وده بيفسر جزء من الحالة العدوانية اللي بيمر بيها الشباب.