العقل الجامع المصري

 امبارح بتاريخ ١ أغسطس لسنة ٢٠١٩ اتكلم رئيس الجمهورية
عبد الفتاح السيسي في مؤتمر الشباب واللي بقى بيعقد كل  سنة في موضوع مهم جدا وهو العقل الجامع المصري

 الكلام حقيقي جيد من ناحية إنه في خلال سنة ونصف من دلوقتي هيتم جمع كل المعلومات اللي بتخص المواطنين المصريين ووضعها في خوادم.
إيه هي بقى الخوادم دي؟

 الخوادم هي عبارة عن أجهزة حاسب آلي بقدرات خاصة جدا  تقدر تقول قدرات فائقة، الاجهزة بتتميز بمساحات تخزين داخلية كبيرة ممكن الجهاز الواحد يصل حجم مساحة الهارد إلى ١٦ تيرا بايت ورامات تصل إلى 256 جيجا ومعالج سريع جدا مهمته انه يعالج كل البايانات، عدد الاجهزة هيكون كتير جدا بحيث انه يقدر يتعامل مع بيانات ١٠٠ مليون مواطن وكل الاجهزة هيتم ربطها بالانترنت وبالتالى أي عملية هيعملها الموظف هيعملها وهو على مكتبه والبيانات تصل فورا للخوادم أو بمعنى إن الموظف هيستدعي المعلومات من الخوادم. 

الاجهزة دي هتكون داخل مبنى قومي وحسب التصريحات فهو هيكون تحت الارض ب ١٤ متر وهيكون كمان في واحد ثاني في مكان آخر وعلى نفس العمق كنوع من أنواع  الازدواجية وذلك لضمان سرعة آداء الخدمة والحفاظ على البيانات

كمان هيكون في خوادم في كل محافظة لمحاكاة الخوادم الرئيسية.

 النظام هيسهل على المواطن المصري التعامل في استخراج كل الاوراق الحكومية واللي كانت بتاخد وقت كتير ومجهود وبقشيش لناس كتير، لك أن تتخيل إن البطاقة والقيد العائلي وشهادات الميلاد والجيش ويمكن حتى الفيش وغيره وغيره هتعملهم من البيت وإنت قاعد بدون التعامل مع أستاذة سهير اللي بتقمع البامية في الدور الثاني ولامع أمين الشرطة اللي عايز ياخد فلوس من تحت الترابيزة، ولا مع الخزنة اللي بتقفل الساعة ٢ ولامكتبات التصوير ولا السايس

حقيقة إحنا اتخرنا أوي في الحركة دي، إلا إن البداية أهم من كل شئ.