فساد المحليات الجزء الاول

الموضوع ده تحديدا ماتعرفش فيه تبدء منين، عشان كده خطر ببالي أقسمه كذا جزء يمكن أعرف أخلص كلام فيه.

موظفين المحليات في مصر نايمة في العسل وفاسدون
 " طبعا معظمهم مش كلهم 🤣🤣🤣🤣"،
 لما تلاقي حد بيبني عمارة ١٢ أو ١٣ دور في شارع عرضه ٤ متر وفي أقل من كده والله أو إنك تلاقي حد  يبني داخل أرض زراعية أو حد بيتعدى على أملاك الدولة اللي هيا في الاساس أملاكنا ، أو إنك تلاقي بلطجية بتحط كراسي للقهوة في الشارع وتاخد جزء منه بشكل إجباري وتمنع السكان إنها تركن عربياتهم ، أو تفتح قهوة في مكان سكني وتفضل فاتح لحد ٢ أو ٣ الفجر والناس تقعد ترزغ على الطاولة طول الليل، أو إنك تلاقي الزبالة بتترمى في أركان الشوارع بالاطنان وغيره وغيره وغيره يبقى لازم الحكومة والمواطنين يفتشوا ورا الموظفين اللي شغالين في المحليات.

أفتكر في مرة كان في حد بني دور مخالف سمعت المقاول وهو بيقول لصاحب العمارة هيبقى يعدي عليك بتاع الحي " ابقى اديله ٥٠٠ جنيه "، الكلام ده بقاله أكتر من ٢٠ سنة تقريبا  في ١٩٩٨،  يعني الحي كان بياخد وقتها على الدور ٥٠٠ جنيه، الوضع في مصر في أماكن كتير في مصر بقى زي الصور

زي ماحضرتكم شايفين كده بالظبط واحد بنى عمارة حوالي عشر أدوار ولا حاجة في وسط أرض زراعية والصورة التانية بتوضح مجموعة الناس بتبني المباني تقريبا حاضنة بعض الفرق بين البيوت وبعضها بيبقى ٣ متر وأقل من كده يعني لو فتحت البلكونة هتسلم على جارك، المشكلة دي تفشت على مدار ٣٠ أو ٤٠ سنة في الدولة المصرية، لحد مابقى أماكن كتيرة في مصر مافيهاش ريحة التخطيط، وأصبح الحل صعب على جميع الاطراف حكومة وأفراد، الحل بقى إنك تهد كل اللي اتبنى وترجع تجيب من الاول، ويمكن الحكومة تغير كمان كل الاساسات الخاصة بالكهرباء والصرف الصحي والمياه وده هيبقى تكلفته كبيرة جدا.

على أد ما الحكومة هي السبب في كل اللي حصل لانها كانت شايفة حجم الرشاوي وساكتة،إلا إن الحكومة دلوقتي بتتحرك أخيرا وفي ظني إنه لازم يكون هناك قانون اللي يتمسك برشوة لازم يتحبس حبس مشدد ٢٠ سنة عشان الناس تخاف وتبطل ترتشي.